شرح اوراق التعيين وفائدتها

بعد ما اتكلمنا عن #نموزج111 وقولنا ايه فايدته وليه بنعملوا ولو معملناهوش ايه اللى هيحصل جه الوقت اللى نتكلم فيه عن ورقتين اساسايتين بنطلهم من الموظف وكالعاده هنقول ايه فايدتهم وليه بنطلبهم :-

نبدأ بالمؤهل:-

يعتبر المؤهل من الاوراق الاساسيه فى ملف العامل طب ليه لازم تبقى فى ملف العامل ؟ لسبب داخلى داخل المنشأه وده بيرجع للتنظيم ان مينفعش حد يمسك منصب قيادى او منصب معين بدون الحصول على مؤهل كذا مثلا ...
والسبب التانى ايه هو طيب يا عم محمد السبب التانى يرجع للماده 32 واللى بتشترط شروط لازم تكون موجوده فى عقد العمل منها #المؤهل اللى طبعا لازم يبقى موجود قدامك عشان تكتبه ولا هتسأل العامل :) :) طب والسبب الثالث يا عم محمد  هو سبب رخم شويه  وبعترض عليه شويتين ان المؤهل بتقدمه مع س1 لان فيه بعض الوظائف مينفعش تأمن على الموظف عليها إلا بحصوله على مؤهل معين .. يعنى ايه برضه ..يعنى لو هتأمن على واحد مدير مثلا وهو مؤهله دبلوم متوسط التأمينات بترفض تأمن عليه بالمسمى ده .. وده وجه اعتراضى لان ممكن يكون واحد خد من الخبره ما يكفيه ان يوصل للمنصب ده تبقى ايه المشكله بقى !!!! ملاحظه فيه مكاتب مش بتاخد بالكلام ده وده اللى مستغرب خاصه المكاتب اللى فى المناطق السياحيه .. 

شهاده الميلاد 

طب ليه بنطلب شهاده الميلاد لانى بعتمد عليها فى قاعده البيانات الخاصه بالشركه   وكمان بطلع بيها او بستعلم بيها بالرقم التأمينى للموظف الجديد والناس اللى لسه مأخدتش رقم تأمينى وكمان بحل بيها مشكله ان لو موظف ليه رقميين تأمينين .
ايوه الموظف ممكن يكون ليه رقمين تأمينين :) :)  اصل انت عارف شغل الحكومه بقى :) :)

الفيش الجنائى

هو احنا ليه بنعمل فيش جنائى ولازم نستلمه من اللى هيتعين جديد  وبنعتبره من مسوغات التعيين الاساسيه وكمان مبندهوش للموظف اللى هيمشى احنا بنطلب الفيش موجه باسم الشركه للسبب ده .
1- عشان محدش يشتغل ويكون مطلوب للعداله او محكوم عليه جنائيا وبالشكل ده تعتبر انت مهربه من العداله .
ياعم طب ازاى مش بنديه للى هيصفى اسمع القصه القصيره دى
كان فيه واحد شغال فى فندق وعمل مشكله كبيره مع اجانب والشرطه والواد ده هرب والشرطه كانت بتلف على الفنادق اللى اشتغل فيها عرفوه كان شغال فين وراحوا الفندق طلبوا الفيش من الفندق ملقلوش فيش  الجنائى وعملو مشكله كبييره اوى مع الفندق .
والجماعه الاتش ار بتوع السياحه كل ما تعين محموعه خد الاسماء الجديده واستعلم عنها ومتنساش التقرير اللى بيروح لشرطه السياحه كل سنه او 6 اشهر

شهاده الموقف التجنيدى 

هو احنا ليه بتاخد شهاده التجنيد من الموظف اللى هيتعين جديد؟
بكل بساطه الوقف التجنيدى مهم جدا عشان المؤسسه او اى منشأه متبقاش مهربه اشخاص من التجنيد خاصه وان بعض المؤسسات بتدى الاشخاص كارنيه بتقول فيه ان الشخص ده مسلم كل الاوراق الاصليه لدى المؤسسه .. طبعا فيه كمبيوتر يعرفوا فيه انت متهرب من التجنيد ولا لا . لكن من قبيل الثقه مش بيبصوا عشان الكارنيه ده .
لازم تبص على شهاده التجنيد كويس وتتأكد انها مش مضروبه عشان متلبس فى الحيط وتشوف هل الشهاده دى مستمره ولا انتهت عشان متستلمش شهاده انتهت ويا سلام بقى لو تبص على ليه واخد اعفاء خاصة اللى بسبب طبى :) :)
طب مين اللى ملزم بالموقف التجنيدى يا عم محمد ؟
اللى ملزمين بيه 1- كل واحد كمل 18 سنه وده بيبقى معاه موقف صغار سن وبيبقى محدد لفتره معينه حتى يقدم للتجنيد ..واول ما يكمل 20 سنه بيقدم للتجنيد ووقتها اما ياخد تأجيل لاى سبب او يكون معفى نهائيا لاى سبب او يكون معفى مؤقت لاى سبب.
طب والعقوبه ايه  لو الشهاده دى مش موجوده يا عم محمد
انا عايز اقولك المسئول ممكن يلبس بسببها سنتين سجن او اكثر وبغرامه من 200 جنيه الى 500 جنيه مصرى وممكن كمان يتحكم عليه بالسجن والغرامه كمان .. يعنى ممكن تروح العنبوكه خلى بالك .
طب ايه اللى يترتب على شهاده التجنيد يا عم محمد ؟ يعنى انا اخدها من الموظف وارميها فى الملف وشكرا على كده طبعا هقولك لع يا حبيبى بلغتنا الصعيديه هيترتب عليها سجلات تجنيد وهشرحهالك البوست الجاى ومش بس كده هرفقلك النماذج بتاعتها
الله يعنى يا حافظ هتتكلم عن سجل التجنيد والاحتياط والاستدعاء وتشرحلهم وكمان ترفق النماذج طب تمام عنب أنا مستنى #اشطه

كعب العمل 

هو احنا ليه بنعمل كعب العمل وايه فايدته ؟

مبدئيا كعب العمل لازم الموظف يجيبه من اى مكتب عمل وغالبا بيجيبه من مكتب العمل التابع ليه اللى بيتم اعاده ارساله الى عنوان مكتب العمل مره اخرى بعد استلام العامل للعمل خلال شهر  من تارخ  استلام العامل للعمل .
طب فايدته ايه : فايدة كعب العمل ان مكاتب العمل بتسجل الكعوب دى عندها وبتقدر تعرف عدد البطاله قد ايه فى الدوله وعدد المشتغلين . طبعا الكلام ده كله بلح ع ارض الواقع لان انا ممكن ابعت كعب العمل بكره والعامل يصفى بعد بكره :) :) وعمار يا مصر .

ازاى بيتم ملئ كعب العمل مكتب العمل قبل ما يدى اللى هيشتغل كعب العمل بيملأ الجزء العلوى وبيسيب الجزء السفلى اللى هو بيانات جهة العمل  تملاها جهة العمل اللى هيشتغل فيها الموظف.
ودى بيانات عادى اى حد يملاها  اهم حاجه عند موضوع الاجراللى مكتوب ف كعب العمل ... فيه ناس بكتب الاجركله  اللى بيحصل عليه الموظف الحقيقى وده ممكن تكتبه لو ماشى قانونى وفيه ناس تانى بجمع الاساسى والمتغير وتحطهم فى الاجر وفى ناس تانى بتكتب الاجر الاساسى + الاجر المتغير من غير ما تجمعهم .كل واحد بيبقى منفصل.... كل الكلام ده صح  وطبعا الاجر ده بيكون شهرى فى غالبيه الشركات  فبنكتب شهرى ...    أما بقى نوع العمل :- غالبيه الشركات بيبقى عقد محدد المده فنكتب مؤقت اما بقى لو مفتوح فنكتب دائم اما بقى لو موسم معين بكتب موسمى ..... فى تاريخ استلام العمل بقى بنكتب استلام العمل وهنا لازم بقى تخلى بالك من حاجه معينه
ان تاريخ استلام العمل اللى هتكتبه فى كعب العمل لازم = تاريخ التأمين على الموظف ولازم = برضه تاريخ بدء العمل فى العقد

يعنى لازم تاريخ بدء العمل فى كعب العمل وعقد العمل وس1 = تاريخ واحد دى الخلاصه .
طب كده كتبنا كعب العمل طريقه الارسال بتبقى ازاى ؟
طريقه الارسال كذا طريقه إما باليد يعنى تروح تسلم كعب العمل انت او الموظف او من ينوب عنه لمكتب العمل اللى خرج من عنده كعب العمل وتخلى موظف مكتب العمل يستلم الاصل ويمضى على صوره انه استلم الاصل ويختم بختم مكتب العمل وترجع تحطه فى الملف تانى . وطبعا غالبا الموظف هو اللى بيسلمه لان المكتب بيبقى قريب ليه وفى منطقته ومن غير المنطقى ان انت تروح بنفسك.
او بترسله بريد عن طريق بتعمل نموزج هرفقه مع البوست ومعاه جواب بتبعته على مكتب العمل ويكون جواب مسجل بعلم الوصول.

ولازم يتبعت كعب العمل خلال شهر من تاريخ استلام العامل للعمل يعنى لو موظف استلم الشغل 1/7/2015 معاك الى 31/7/2015
بعد كده هتبقى غرامه على الشركه .

طب الغرامه دى كام يا عم محمد  الغرامه دى  بقى  لا تقل عن مائتي جنيه ولا تجاوز خمسة ألاف جنيه. وطبعا مع عدم تكرار العقوبه بمعنى انك لو اتعاقبت عشان مخالفه مينفعش تتعاقب عليها تانى 
طب ا عم محمد اكد كلامك من القانون بص يا سيدى الماده اللى بتتكلم عن كعب العمل هى الماده 15 واللى بتتكلم عن عقوبتها الماده 239.

استمارة اشتراك مؤمن عليه أو س1

مبدائيا هيكون فيه اكتر من 6 بوستات عن س1 لان هشرح كل نقطه فيها بحيث تكون فاهمها كلها بكل متعلقاتها.
نبدأ بقى : هو احنا ليه بنعمل س1 ؟ احنا بنعمل س1 عشان نأمن على العامل الجديد اللى هيشتغل فى الشركه
طب ليه نأمن عليه اساسا ؟ احنا بنأمن على العامل عشان يتمتع بالمزايا اللى بيدفع مقابل ليها .
طب ايه ايه المزايا دى ؟ المزايا دى بتختلف من شخص للتانى هيتم شرحها بعدين بس الموظف العادى بيتمتع بمزايا واللى بدفع فيهم فلوسه فى التأمينات اللى هما (تأمين الشيخوخه والوفاه -المكافأه - اصابات العمل - تأمين المرضى -تأمين البطاله).
دى كانت فكره عامه عن ليه بنعمل كده وايه العائد

نتكلم فى اصل الاستماره بقى

عامة س1 زيها زى اى ورقه فيها بيانات عاديه بنملاها
بيانات خاصه بالشركه زى اسم الشركه المسجل وزى الرقم التأمينى للشركه اللى الموظف هيدخل فيها برقمه الخاص .
بيبقى مكتوب فوق منطقه ومكتب ودى عاديه بتكتب فيها المنطقه اللى تابع ليها المكتب واسم المكتب والوحده اللى بتدخل فيها الاستماره وهى وحده تسمى بالاشتراكات ان الموظف ده هيشترك فى خدمه التأمين. رقم المنشأه واسمها وقطاع المنشأه طبعا اغلب الشركات الخاصه هو (قطاع 3 ).
بيانات المؤمن عليه بقى
ودى الرقم التأمينى بتكتب الرقم التأمينى للموظف اللى هو بيجيبهولك من التأمينات فبرنت للامان او انت بتستعلم عنه طب افرض واحد لسه لم يسجل ليه رقم تأمينى عادى متكتبش الرقم التأمينى وكده كده بيبقى مرفق مع الاستماره شهاده ميلاد بيقدر الموظف يحطله رقم تأمينى وتسجله فى الاستماره وتسلمها عادى  .
طب يا عم محمد انا مره حصلت معايا وحطيت الرقم التأمينى لموظف فى الاستماره وروحت اشوف اتأمن عليه ولا لا لقيت الموظف بيقولى لا ده غير مؤمن عليه ومش بس كده ده كمان ادانى رقم تأمينى للموظف غير اللى كان معايا فى البرنت اللى الموظف ادهولى  انا بقى اقولك هنا ما تقلقش فيه ناس التأمينا شغلها عالى اوووى فبيغلطوا ويدوا الموظف رقميين تأمينين ايه ده انت هتهزر ما تقول كلام كويس ياعم تقصد ان يبقوا مأمنين عليه شويه بده وشويه بده لالا يا عم بيبقى واحد فيهم مفعل وهو الصح والتانى مبيبقاش مفعل بس مسجل باسم العامل برضه . وبكده يبقى الموظف ليه رقميين تأمينين .
طب يعنى ايه المطب ده واطلع منه ازاى اقولك يا عم سهله اووى والموضوع مش صعب كل الموضوع انك هتخلى الموظف ياخد شهاده الميلاد ويروح بيها اما مكتب تأمينات التابع ليه محل الميلاد او الاقامه او المكتب الرئيسى بالالفى ويقول للموظف انا ليا رقميين تأمينين وهو الموظف هياخد الرقمين ويلغيلوا رقم منهم ويديه الرقم الصح اللى هيمشى عليه علطول والموظف هيجيلك ويديك الرقم الصح وانت هتروح تبلغ التأمينات بالموضوع وهما هيدخلوه على الرقم الللى شغال والمدد القديمه بتبقى زى ما هى لان انا قولتلكم ان فيه رقم مش بيبقى عليه اى مدد وبيبقى فاضى طب وافرض عليه مدد اقولك ما تقلقش هينقلوه عليه ..