صندوق اعانه الطوارئ واجراءاته

صندوق اعانة الطوارئ

#لكل_اتش_ارجي

#معلومتي_مع_حافظ

كنا اتكلمنا في البوست اللى فات واللى كان اسمه #حظر_التجوال_له_ماله_وعليه_ما_عليه عن شويه حاجات كده تخص صندوق اعانه الطوارئ وكنت بلغتكم بالخبر السعيد ان مكاتب العمل جالها قرار باستقبال طلبات الصرف من الصندوق واللى جه كان بيقصد السياحه تحديدا ولكن اعتقد انه هيعمم . طب تعالو نراجع بسرعه  هنقول ايه هو صندوق اعانه الطوارئ  - شروط الصرف من الصندوق – إجراءات الصرف من الصندوق  - وهنفرق كل ده بمستنداته . طب نبدأ من الأول

ايه هو صندوق اعانه الطوارئ  ؟

ده يا عم صندوق أنشئ خصيصا  للازمات اللي بتحصل للشركات واللي يخليها ما تقدرش تصرف أجور الموظفين  فالصندوق ده بيصرف المساعدات  والاعانات للعمال اللي شركتهم توقفت عن صرف الأجور او اللي حصل ليها اغلاق كلي او جزئي

السؤال التاني  : ما هي موارد الصندوق (اعانه الطوارئ )

طبعا يا معلم موارد الصندوق ده أولا من كل الشركات اللي موظفيها من 30 عامل  او اكثر ودي بتلتزم بدفع 1% من اجمالي الأجور الاساسيه بشكل شهري  وعلى فكره سواء المنشاءات دي قطاع عام او خاص او حكومي اه ما تفتكرهاش كوسه ياعم  طب وشركات الجيش لا انا ماليش دعوه ومعرفش ومش عايز اعرف

كمان من موارد الصندوق الغرامات  نتيجه عدم الالتزام بالدفع طب ودي كام يا عم حافظ  دي يا معلم 50 % من اجمالي القيمه المستحقه خلال الشهر التأخير طب وهيعرفوا ازاي لا بقى ما تعملش صايع  لان هنا عريان يا معلم التأمينات مربوطه بالصندوق  فكده كده متشاف يعني متصعش  (هتدفع يعني هتدفع )

وكمان أي تبرعات او هبات اللى بتيجي من الناس اللى هي بتبقشش  واللي طبعا لازم يقبلها رئيس الصندوق  (اعانه الطوارئ ) طب هو يا حافظ ممكن رئيس الصندوق ما يقبلش  يا راجل كبر مخك 

وكمان من عائد استثمار المبالغ دي في البنوك ايوه فلوس الصندوق محطوطه في البنوك وكل يوم بتعد يا معلم والدنيا زي الفل وكمان بيتعمل قوام ماليه كل سنه كأنه شركه يعني .

طبعا عارفين ان الجهاز المركزي للمحاسبات هو اللى بيراقب على موضوع الصندوق ده زيه زي أي جهه

طب مين أعضاء ومجلس اداره الصندوق :-

عندك الباشا الكبير  وزير القوي العامله

وبعض الأعضاء حسب خبراتهم ووظائفهم

وشويه رجاله حيتان كده بيمثلوا أصحاب الاعمال ايوه مش احنا بندفع نبقي أعضاء برضه

وطبعا شويه رجاله كده بيمثلو النقابات  وركز ع النقابات عشان دول لا مؤاخذه خازوق جاي ف السكه

وطبعا اللى بيشكل مجلس اداره الصندوق وأعضاء والليله الكبيره دي سعتك هو رئيس الوزراء

شكرا يا عم حافظ طب ايه شروط الصرف من الصندوق ؟

- تصرف الاعانة لمدة ستة أشهر كحد أقصى إلى أن يتم إعادة التشغيل المناسب للمنشأة و اتخاذ الإجراءات القانونية التي من شأنها عدم استحقاق صرف الإعانة أو حصول العامل على فرصة عمل بديلة أيهما أقرب و يكون الصرف بواقع ( 75 % ) من الأجر الأساسي بحد أدنى 150 جنيهاً وحد أقصى 1000 جنيه شهرياً علما بأن تم تعديل مبلغ الصرف واصبح  الصرف بكامل الاجر الأساسي 100% من الاجر الاساسي  بحد ادني 600 جنيهاومرفق المستند . .
- ان يكون هؤلاء العاملين من المؤمن عليهم لدى التأمينات الإجتماعية .
- ان يكون العالم قد أمضى بالمنشأة مدة لا تقل عن سنة على الأقل .
- أن يكون صرف الاعانة للعاملين بالمنشأة التي يسري عليها القانون بشيكات موقعاً عليها من الأمين العام للصندوق أو من يفوضه كتوقيع أو ويكون التوقيع الثاني للمختص بمسك الدفاتر أو من ينوب عنه

كمان في افتكاسه جديد وهي خطابات من النقابات التي تخضع لها المنشأه

كمان لا يجوز ان يكون اجمالي المبالغ المصروفه بأكثر من 20 % مناجمالي موارد الصندوق وقت الصرف ودي حاجه جميله عجيبه غريبه مريبه 

طب يا عم حافظ من اللي ليه حق يصرف  ؟

رئيس الصندوق اللى هو قلنا قبل كده وزير القوي العامله بيقدم تقرير بكل حاله لرئيس الوزراء ورئيس الوزراء يعتمد الصرف بس في الوقت ده اعتقد الموضوع صعب .

طب نختصر وندخل في المفيد  ما هي إجراءات الصرف من الصندوق   ؟

بس يا عم إجراءات الصرف بتتكون من  6  نماذج بتملاهم وهيلا هوب بتقدمهم لمكتب العمل  وهرفقهم ليك في البوست

النماذج دي عباره عن :-

1-      طلب صرف اعانه الطوارئ

2-      تقرير توقف جزئي / كلي

3-      بيان العمال المضارين من التوقف

4-      تقرير النقابه التابعه ليها الموؤسسه  عن حاله التوقف الجزئي / الكلي

5-      تعهد باخطار الصندوق عن اعاده التشغيل

6-      تفويض وتعهد

الموضوع مش محتاج شرح لاني هرفق ليكم المستندات تملوها وبتعمل ملف وتسلمه لمكتب العمل التابع ليه وهو هيساعدك في باقي الإجراءات . في الحاله اللي احنا فيها اعتقد ان موضوع النقابه مش هيتفعل وهيتسهل .

الموضوع المهم  التاني بقي موضوع العماله المؤقته واللى الدوله قالت هنصرف ليهم 500 ج كاعانه

يا جماعه الموضوع مش بالسهوله دي

لازم العماله دي يكون ليها كارنيه والكارنيه ده أصلا بيتعمل من مكتب العمل وهو شغال بصوره البطاقه

ولازم العماله دي يكون بيدفع ليها  3 % اعانه طوارئ .

وبناء على الكلام ده بيصرف  يعني موضوع سجل بياناتك  عشان تصرف ده بلح البلح يعني 

اتمني أكون وضحت كل حاجه باختصار  وشكرا ليكم جداا واللي عنده سؤال ممكن يسال في  تعليق وان شاء الله اجاوبه .

كمان انتظروا ان شاء الله فيديو للموضوع ده وكمان شرح للتوقف الجزئي والكلي للمنشات واثره

#معلومتي_مع_حافظ