التقرير المالى لتعديل الاشتراكات التأمينيه (س2)
بص يا معلم قبل ما تنزل س2 وتعملها لازم تعرض تقرير عنها لمديرك اللى بدوره يعرضها على رئيس مجلس الاداره عشان يتفشخر بيها قدام المديرين فى الاجتماع او فى الغرف المغلقه وعشان رئيس مجلس الاداره يبقى مبسوط وسعيد ويعرف ان عنده منظومه اداريه قويه وكله بيشتغل تحت خطط ورؤى
هكلمكم عن فايدة التقرير ده ايه الاول
اولا :- ليك انت شخصيا ياللى بتعمل التقرير (أيوه انت )
دى بتبين قد ايه انت راجل منظم وفاهم شغلك وفاهم يعنى ايه منظومه اداريه بتشتغل فى ترس واحد وكله بيكمل بعضه مش بعشوائيه وكمان بتعلى نظرة مديرك ليك ونظره الاخرين ليك غير شويه حاجات كتيره مش هينفع اعبر عنهم وبتعرفك انت كتأمينات النهارده فين وبكره فين ودى هتفيدك اكتر لو بتعمل plan مستقبليه لزياده الاجور التأمينيه عشان تشتغل قانونى ودى ممكن تاخدها كمرحله اولى تمشى عليها .
ثانيا :- بالنسبه لمديرك
طبعا مديرك هو شكلك قدام الادارات ومجلس الاداره فلازم تعلى من ده عشان انت تعلى مديرك لما بيطلع بتقرير زى ده حتى لو كان قانونى او او بيبان قدام مجلس الاداره انه فعلا راجل فى ادارته عنده رؤى وبيهتم بالامور الماليه اللى هى تخص الشركه وقد ايه الراجل ده بيحسب بالتفتوفه ماليا وخايف ع الشركه وبيشتغل فى عمل جماعى وكل تحت مظله سعتك اللى هو رئيس مجلس الاداره . وبتخلى مديرك فى save site من اى مشاكل وليه زودت الناس وكده
ثالثا :- بالنسبه للمدير المالى
المدير المالى بيهمه الفلوس يعرف هو هيدفع كام وايه الزيادات المستقبليه فى الامور الماليه عشان يضع ده فى خططه المستقبليه ويعرف هيطلع فلوس قد ايه من الخزنه وهل ده شهريا ولا سنويا ولا ايه وعشان يعمل حسابه .
رابعا : بالنسبه لرئيس مجلس الاداره
اهم حاجه عند رئيس مجلس الاداره الربحيه اول ما تقله هتدفع تلاقيه كش كده سبحان الله متعرفش ازاى فهى دى فلوسه وفلوس الشركاء وكده فلازم يعرف نفسه هيتكلف كام وايه اللى هيكون ملزم بيه بعد كده وعشان ميجيش يقولك افرض مكنتش عاوز ازود الناس وانت بتتصرف من دماغك وكده هتقله قانون ايوه سامعك انك هتقوله كده فيروح هو يكون راجل عقر ويقولك طب مانا مش هزودهم بالقانون برضه ويطلع اصيع منك وكده ويقولك انا هقدم طلب ان الشركه لظروفها الاقتصاديه لا تسمح بالزيادات دى وهاخد موافقات من الجهات المختصه بكده ومش هزود ال 7% اللى انت بتقول عليها دى وادينى قانونى اهو تروح انت مكسوف من نفسك وتسكت متتكلمش تانى او يقولك بكل بجاحه :) ياعم مش هو ده القانون بتاعك تقوله ايوه يقولك مش هطبق القانون وهتحمل اى تبعات قانونيه مش دى فلوسى انت مالك :) تاخد انت بقى نفس عميق بعد ده كله وتلم ورقات من ع المكتب وتروح تقعد فى البيت :)
خلصنا !!! لت وعجن كلام ممكن ندخل فى الجد ادخل ياعم
ازاى اعمل التقرير ده
بص يا معلم قبل ما اقولك ازاى تعمل التقرير ده هقولك هو بيأثر على ايه وايه الجوانب اللى هتتأثر ب س2
اولا : شيك التأمينات الاجتماعيه الشهرى ده اول حاجه هتتأثر وبناءا عليه
ثانيا : هيتأثر بالتأكيد شيك 1% اعانه الطوارئ الشهرى
ثالثا :- هيتأثر كمان شيك التأمين الصحى بالنسبه للمنشات المعفيه لان نسبه الاوعيه هتزيد بناءا على زياده الاجود
رابعا :- لو فى ضم علاوات اللى هى بتتضم كل 5 سنين هتزود معاك الشيك برضه
نبدأ بقى ونشوف هنعمل التقرير ده ازاى
اول حاجه تشوفها هى كم عدد الموظفين المستحقين للزياده س2 وتستبعد الغير مستحقين للزيادهبص بقى اى حد مكملش سنه لا يستحق الزياده دى يعنى لو واحد تاريخ تعينه 2/1/2015 لا سيحق بينما اللى تاريخ تعيينه 1/1/2015 يستحق الزياده بس ملحوظه كنوع من الصياعه وكنوع من انى عاوز ازود الموظفين فيه بعض الاماكن كنت مفهمهم ان المقصود بالسنه هى السنه الماليه وكنت بقولهم ان اى حد اتعين قبل 30/6 يستحق لانه كمل سنه ماليه وكده طبعا ده غلط بس بديك المعلومه :)
عرفت عدد الموظفين الموظفين (اكتبهم على جنب )
كده انت قدام 3 خيارات
الاول :- ان حضرتك هتشتغل بالطريقه الاولى يعنى هتضرب الاساسى * 7% وشكرا وعمره ما هيجيب الحد الاقصى لان 1012.5 الحد الاقصى السابق *7% = 1083 فمش هيجيب الحد الاقصى الحالى ودمتم .
وده معناه انك هتضرب اجر كل الموظفين الاساسى *7% = اجمالى الزيادات (اكتبهم على جنب ).
الثانى :- ان حضرتك هتشتغل بالطريقه التانيه انك هتعلى بنسبه 7% كل الموظفين المستحقين عادى بس عندك ناس مرتباتها عاليه وهتخليهم حد اقصى اساسى ومتغير الناس دى بقى هتعملهم حصر لوحدهم وتشوف مبلغ الزياده اللى وصلهم للحد الاقصى اللى هو من 1012.50 الى 1120 اللى هو مبلغ =107.5 فى الاساسى ده لكل موظف .. وكمان هتشوف مبلغ الزياده فى المتغير اللى يوصلهم للحد الاقصى فى المتغير من 1830 الى 1210 =620 فى المتغير لكل موظف
وهتبدأ تجمع الناس اللى وصلتهم للحد الاقصى بالمبالغ دى لوحدهم الاساسى لوحده والمتغير لوحده (وتركن كل مبلغ على جنب )
بعد كده هتشوف الناس اللى مش هيوصلو للاقصى يعنى الاساسى بتاعهم قليل وهتضربه * 7% ده لبقيه الموظفين (وتركن المبلغ اللى هيطلع على جنب) .
الثالث :- انك مأمن على الموظفين بمبلغ قليل جدا وبالتالى هتحسب مجموع الاجور الاساسيه وهتضربه *7% هيديك قيمه الزياده (حط الرقم ده على جنب )
بعد كده تبدأ تشتغل بقى
لو حسبت على الشكل الاول يبقى هتشوف اجمالى الزيادات = حاصل ضرب الاجور الاساسيه * 7% = رقم ناتج
الرقم ده هو الزيادات المنشأه هتدفع 40% منه يبقى الرقم الناتج *40% = حصيله ما تدفعه المنشاه بسبب الزياده اهو الرقم ده هو اللى هيكون زياده عن على شيك التأمينات ما قبل س2
حصه صاحب العمل من الزياده = الرقم الناتج * 26%= اللى هيدفع صاحب العمل من الزياده
حصه العامل من الزياده = الرقم الناتج *14% = اللى هيدفعه العامل من الزياده
_____________________________________________________
لو حسبت على الشكل الثانى طبعا طلعت الارقام للى وصلتهم للحد الاقصى فى الاساسى هتجمعهم مع بقيه الزيادات العاديه للناس اللى ما وصلتش للحد الاقصى = مبلغ الزيادات لجميع الموظفين بعد اضافه 7%
اللى هتدفعه المنشأه فى الزيادات = مبلغ الزيادات فى الاساسى * 40%
اللى هيدفعه صاحب العمل = مبلغ الزيادات *26%
اللى هيدفعه العامل = مبلغ الزيادات *14%
المتغير :- فيه رقم متغير قلتلك شيله على جنب للناس اللى انت وصلتهم فى المتغير للحد الاقصى
الزياده اللى هتدفعها المنشأه = اجمالى الزيادات فى المتغير *35%
الزياده اللى هيدفعها صاحب العمل = اجمالى الزيادات فى المتغير * 24%
الزياده اللى هيدفعها العامل فى المتغير = اجمالى الزيادات فى المتغير * 11%
اجمالى الزيادات فى شيك التأمينات = مبلغ الزيادات فى الاساسى *40% + مبلغ الزيادات فى المتغير *35%
________________________________
لو حسبت على الشكل الثالت مثل الشكل الاول تماما
________________
الخلاصه ... ان اجمالى الزيادات بعد 7% *40% + اجمالى الزيادات فى المتغير *35% هى دى هتبقى الزياده فى شيك التأمينات بعد س2
بعد ما عرفنا تأثير الزيادات على التأمينات الموضوع طويل شويه لسه هبقى اشرحلكم تأثير الزيادات على الجوانب الاتيه :-
اولا : هيتأثر بالتأكيد شيك 1% اعانه الطوارئ الشهرى
ثانيا:- هيتأثر كمان شيك التأمين الصحى بالنسبه للمنشات المعفيه لان نسبه الاوعيه هتزيد بناءا على زياده الاجود
ثالثا:- لو فى ضم علاوات اللى هى بتتضم كل 5 سنين هتزود معاك الشيك برضه
والله مضغوط شويه ويارب مكنش قصرت فى النقطه الاولى هحاول بعد كده ابسط شرح فى بقيه النقط التانيه عشان مطولش وهتكون ابسط من كده
