كلامنا النهاره عن فتره الاختبار
يعنى ايه فتره اختبار ؟
فتره الاختبار دى حاجه زى التجربه يعنى هنجرب بعض العامل وصاحب العمل اللى ميعجبوش شغل التانى ميكملش معاه
يعنى لو العامل معجبوش الشغل يمشى ولو صاحب العمل معجبوش العامل يمشيه وده لا يعتبر فصل تعسفى هو بس هيخطره بورقه كده يقوله فيها ان حضرتك راجل محترم وكويس وبن ناس بس غير صالح للعمل وبتتكب فى س6 عدم صلاحيه او عدم اجتياز فتره الاختبار .
طب مدتها كام يعم محمد الفتره دى ؟
بص يا عم مدتها 3 شهور يعنى ايه 3 شهور يعنى 3 شهور بالتمام والكمال يعنى مش 90 يوم لان فيه اشهر 30 يوم واشهر 31 وشهر 28 وبالتالى هى 3 شهور بتخضع للشهر مش لليوم .
برضه يعنى ايه ؟
يعنى ياعم بتبدأ فى اول شهور من تاريخ بدايه العقد والعقد بيستمر فى السريان بشكل طبيعى وحلو اذا الفتره دى عدت من غير ما حد يقول للتانى مع السلامه يبقى كده العقد يكمل مدته اللى هى 9 شهور لو سنوى .
يعنى افهم من كده ان المده دى جوه العقد مش خارجه منه ايوه هو ده هى جزء لا يتجزأ منه ولا تنفصل عنه يعنى كده يا حماده فيه ناس بتألف وتقولى ان المده دى لو عدت يبقى نمضى عقد ولو معدتش كل واحد يروح لحاله ايوه فيه ناس بتألف وفتايه جداا واللى يقولك كده مألفاتى درجه اولى .
طب يا محمد ده فيه ناس بتقولى ان انا هأمن عليك تأمين اجتماعى بعد الفتره دى عايز اقولك ان برضه الناس دى مألفاتيه برضه وعايشن فى المزاريطه مع فزاع طالما هى بتدخل فى مده العقد يبقى التأمين عليك من اول يوم فيها وفى حاله عدم اجتيازها عادى بخطر العامل واعمل س6 عادى واكتب فى سبب ترك العمل عدم الصلاحيه او عدم اختياز فتره الاختبار ما فيهاش مشاكل
طب فتره الاختبار دى بتتعمل كام مره ؟
هى بتتعمل مره واحده بس لدى صاحب عمل يعنى مينفعش اعملها مره ونص حتى تانى . يعنى الموظف بتعمل معاه فتره اختبار واحده بس مدتها 3 شهور لدى صاحب عمل واحد ومينفعش تتكرر.
ياعم ده انا اللائحه عندى بتقول ان العامل 6 شهور فتره اختبار ومكتب العمل ماضى وموقع عليها ؟
ما فيش حاجه اسمها لائحه او سياسه تخالف القانون وكون انك ماشى ورا اختام واتقلبت موظف حكومه يبقى انت كده وصلت لمرحله صعبه . ويقع باطلا اى اتفاق يخالف احكام هذا القانون (اللى هو قانون العمل رقم 12 لسنه 2003). الفيصل هنا واللى بيحدد العلاقه بينك وبين المكاتب المختلفه هو قانون العمل .
طب يا عم محمد انا هخالف احكام هذا القانون وهذه الماده ؟
انا مقولتلكش ما تخالفش بس هتدفع يعنى هتدفع :) هدفع ايه يا عم ؟ هتدفع الغرامه يا حبيب اللى هى كام متقلش عن 100 جنيه ولا تزيد على 500 جنيه وتتعدد بتعدد العمال وتضاعف فى حاله التكرار.
